काठमाडौं । हुम्लामा नेपाली भूभागभित्र चिनियाँ झण्डा गाडेको पाइएको छ ।
हालै सरकारी समितिले हुम्लाका धेरै ठाउँमा सीमा मिचिएको प्रतिवेदन सरकारलाई बुझाएका बेला फेरि चीनको अर्को कर्तुत बाहिर आएको हो । जसमा हुम्लामा पर्ने नेपाली भूमि हुम्लाको नाम्खा गाउँपालिकाको लिमी लाप्चा पहाडमा चीनले झण्डा गाडेको पाइएको हो ।
लाप्चामा स्वास्थ्य शिविर सञ्चालन गर्न गएका चिकित्सकले नेपाली भूमिमा चिनियाँ झण्डा गाडेको तस्बिर तथा भिडियो खिचेर सार्वजनिक गरेका छन् । गत वर्ष नै चीनले हुम्लामा नेपाली भूमि मिचेको विषय बाहिरिएपछि हुम्लाका स्थानीय जनप्रतिनिधि तथा काँग्रेस नेता जीवनबहादुर शाहीले स्थलगत अध्ययन गरी सरकारलाई पहल चाल्न आग्रह गरेको थियो । तर तत्कालीन कम्युनिस्ट सरकारले सीमा नमिचेको भन्दै चीनको बचाउ गरेको थियो ।
तर सीमा मिचिएको भन्दै हुम्लाका जनप्रतिनिधिले निरन्तर आवाज उठाएपछि कांग्रेस सभापति शेरबहादुर देउवा नेतृत्वको सरकारले समिति बनाएर सीमा क्षेत्रको स्थलगत अध्ययन गर्यो । अध्ययनमा धेरै ठाउँमा सीमा मिचिएको पाइयो । यो कुरा परराष्ट्रमन्त्री नारायण खड्काले चिनियाँ समकक्षी वाङ यीसँग पनि उठाएका छन् ।
मिचिएको सीमा फिर्ता गर्न द्विपक्षीय वार्ताको पहल भइरहेका बेला हुम्लामा स्वास्थ्य शिविर गएका डा. नितेश घिमिरेले नेपालीमा भूमिमा चिनियाँ झण्डा गाडिएको तथ्य बाहिर ल्याएका हुन् । उनले भिडियो सामाजिक सञ्जालमार्फत सार्वजनिक गरेका छन् । ४९ सेकेन्ड लामो भिडियोमा उनले भनेका छन्, ‘हामी अहिले लिमी लाप्चाको बोर्डरमा छौँ, चाइनाले यसरी आफ्नो झण्डा नेपाली भूभागमा ल्याएर गाडेको रहेछ, यो देख्दा एकदम दुख लाग्छ ।’
विगतमा कैलाश मानरोवर क्षेत्रसमेत नेपाली भूमिमै रहेको जनाउदै उनले अघि भनेका छन्, ‘हाम्रो पहिलाको कैलाश मानसरोवर ताल, कैलाश पर्वत सबै हाम्रै थियो, अहिले चाहिँ यसरी उनीहरूले अतिक्रमण गर्दा गर्दा त्यहाँसम्म (औँलाले चिनियाँ भवन देखाउँदै) क्याम्प बनाइसकेको छ । अहिले हुँदा हुँदा झन्डा पनि यहाँ गाडी सकेको रहेको छ ।’ सरकारले यो विषयमा कडा कदम नचालेकोतर्फ दु:ख व्यक्त गर्दै उनले भनेका छन्, ‘अब सरकार बोल्दैन । हामी केही गर्न सक्दैनौँ । यहाँसम्म आएर के भएको रहेछ हेर्न आइयो । स्वास्थ्य शिविर गर्न आउँदा, यो देख्दा यहीँ आएर चाहिँ फिल हुन्छ कति मन दुख्छ भनेर । सरकारविहीन देश भनेको यस्तै रहेछ ।’
विगतमा कम्युनिस्टहरुको साथ पाएर सीमा नमिचेको र सीमामा कुनै समस्या नभएको दाबी गर्ने चिनियाँ दूतावास, सुन्दरी राजदूत र चीनको बचाउ गर्ने कम्यनिस्टहरुको असली चेहरा एकजना डाक्टरले बाहिर ल्याएका छन् । जस्तोसुकै बदमासी गरेपछि कम्युनिस्ट सेन्टिमेन्टमा आँखा चिम्लिने उल्टै जोगाउने कम्युनिस्टहरुको मुखुण्डो उत्रिएको छ ।