बाजुरा विमानस्थलमा तारा एयरको बिमान खराब भएपछि यात्रुले धक्का लगाउनु परे

काठमाडौं । जमिनमा गुड्ने सवारीसाधनलाई हामीले धकेलेको वा धकेल्नु परेको थुप्रै दृश्य देखेका छौं । तर हाम्रो देश नेपालमै एउटा अनौठो दृश्य देखिएको छ । त्यो हो हवाईजहाज मानिसले धकेलेको दृश्य । यो घटना बाजुराको हो ।

बाजुरा विमानस्थलमा तारा एयरको बिमान खराब भएपछि यात्रुले धक्का लगाउनु परेको छ । तारा यति एयरलाइन्सको भगिनी कम्पनी हो ।

यति एयरलाइन्सका प्रवक्ता सुरेन्द्र बर्तौलाका अनुसार हुम्लाको सिमकोटबाट ९ एन–एभीई जहाज बाजुरा विमानस्थलमा अवतरण गरेपछि धावनमार्गबाट ट्याक्सी–वेमा पुगिसकेको थियो ।

त्यहाँ पछाडिको टायर पड्किएपछि जहाजका कारण ट्याक्सी–वे अवरुद्ध भयो ।

विमानस्थलमा समिट एयर र तारा एयरबाट नेपालगञ्ज झर्न यात्रुहरु प्रतीक्षारत थिए । तर टायर पड्किएको तारा एयरलाइन्सको विमान ट्याक्सी वेबाट नहटाएसम्म उड्न नपाउने भए ।

त्यसपछि यात्रु र सुरक्षाकर्मी मिलेर ट्याक्सी–वेबाट जहाजलाई धकेलेर किनारा लगाए ।

त्यसपछि नेपालगञ्जमा रहेको तारा एयरको अर्को जहाजमार्फत टायर र इन्जिनियर लिएर बाजुरा पुग्यो ।

टायर फिट गरिसकेपछि दुबै जहाज अहिले नेपालगञ्ज अवतरण गरिसकेको जनाइएको छ ।

जहाज धेकेलेको भिडियो अहिले समाजिक सञ्जालमा भाइरहल भइरहेको छ ।