नेपाल–भारतबीच मंगलबार द्विपक्षीय वार्ता हुँदै

काठमाडौं : नेपाल र भारतबीच कालापानीको सीमा विवादयता पहिलोपटक वार्ता हुने भएको छ । वार्ता काठमाडौंमै भिडियो कन्फरेन्समार्फत् हुनेछ ।

वार्ताको मिति तय नभएपनि १८ अगष्टका हुनसक्ने जनाइएको छ । भारत सरकारको सहयोगमा भइरहेको विकास आयोजनाको प्रगतिबारे वार्ता केन्द्रित हुने बताइएको छ ।

भारतको सहयोगमा नेपालको तराई क्षेत्रमा सडक तथा रेल मार्ग निर्माण भइरहेको छ भने भूकम्पपछिको पुनर्निर्माण, प्रहरी प्रशिक्षण एकेडेमी, पोलिटेक्निक कलेज तथा पाइपलाइन निर्माणको काम पनि भइरहेको छ ।

परियोजनाहरुको मूल्यांकनका लागि सन् २०१६ मा गठन गरिएको संयुक्त समितिको बैठक पछिल्लो पटक सन् २०१९ को जुलाईमा भएको थियो ।

वार्तामा नेपालका तर्फबाट परराष्ट्र सचिव शंकर दास बैरागीले टोलीको नेतृत्व गर्नेछन् । भारतका तर्फबाट राजदुत विनय मोहन क्वात्राले नेतृत्व गर्नेछन् ।

भारतले नेपालमा सडक, पुर्ननिर्माण, रेल्वे, तेल पाइपलाइन, सीमा चेकप्वाइन्ट, नेपाल प्रहरी एकेडेमीलगायतको निर्माणमा सहयोग गरिरहेको छ । यसपटकको वार्ता विकास निर्माण आयोजनाको प्रगतिबारे केन्द्रित हुनेछ ।