शेयर गर्नु होस
  • 13
    Shares

 विराटनगर । मोरङको उर्लाबारी नगरपालिका–५ का ३१ वर्षीय प्रवीण बास्तोलाको शंकास्पद मृत्यु प्रकरणमा प्रहरीको अनुसन्धानमा कमजोरी देखिएको छानबिन समितिले निष्कर्ष निकालेको छ ।

जिल्ला प्रहरी कार्यालयका डीएसपी मानबहादुर राई नेतृत्वको टोलीले अनुसन्धानमा प्रहरी अधिकृतको कमजोरी रहेको निष्कर्ष निकालेको हो ।

समितिको प्रतिवेदन बुझाएपछि इलाका प्रहरी कार्यालय उर्लाबारीका प्रहरी निरीक्षक उद्धव पोखरेल जिल्ला प्रहरी कार्यालयमा तानिएका छन् । उनको स्थानमा कुन्दन देवलाई पठाइएको छ ।

मिसिलमा अर्कै व्यक्तिको फोटो 

गत पुस ५ गते शंकास्पद अवस्थामा बास्तोलाको मृत्यु भएपछि उनका बुवा प्रेमप्रसाद बास्तोलाले प्रहरीमा ६ जनाविरुद्ध किटानी जाहेरी दिएका थिए । तर मिसिलमा प्रवीणको तस्वीर भनी अर्कै व्यक्तिको तस्वीर परेपछि प्रहरीले अनुसन्धान राम्रो नगरेको भन्दै दुईसाता अघि आफन्त र स्थानीयवासिन्दाले विरोध जनाएका थिए ।

मिसिलमा अर्कै व्यक्तिको फोटो राखेर बदनियतपूर्वक अनुसन्धान गरेको आरोेप आफन्तको थियो । समितिले इलाका प्रहरी कार्यालयमा रहेको मिसिलको नक्कलमा फोटो परिवर्तन भए पनि सरकारी वकिलको कार्यालयमा रहेको सक्कल मिसिलमा बास्तोलाकै फोटो रहेकाले वदनियत नरहेको उल्लेख गरेको छ ।

समितिले छानबिन गर्दा कार्यालयमा राख्ने कपी मिसिलमा गत भदौ ३ गते करेन्ट लागेर मृत्यु भएका मोरङको लेटाङ नगरपालिका–८ घर भई उर्लाबारी–७ मा बस्दै आएका २६ वर्षीय नवीनराज घिमिरेको फोटो परेको पत्ता लगाएको हो । करेन्ट लागेर घाइते भएका घिमिरेको गोदावरी अस्पतालमै उपचारका क्रममा मृत्यु भएको थियो ।

घटना अनुसन्धानका क्रममा राखिएको उनको फोटो प्रहरी जवानले कम्प्युटरबाट प्रिन्ट गरेर निकाल्दा बास्तोलाको भनेर घिमिरेको फोटो राखेको देखिएको छानबिन प्रतिवेदनमा उल्लेख छ ।

छानबिन समितिले के देख्यो कमजोरी

छानबिन समितिले प्रहरी अनुसन्धान अधिकृतको कमजोरी देखाएको छ । घटनासम्बन्धी कागजातहरु नियमित प्रमाणीकरण तथा अनुसन्धानमा नियमित समन्वय र सम्पर्क गरेको नदेखिएको समितिको निष्कर्षमा उल्लेख छ । पीडितमैत्री व्यवहार गर्नुपर्ने उल्लेख गर्दै समितिले अनुसन्धान अधिकृतलाई विभागीय कारबाहीस्वरुप सचेत गराउनुपर्ने सुझाव दिएको छ ।

पोस्टमार्टम एवं भिसेरा परीक्षणका लागि शव तत्काल पठाएर रिपोर्ट चाँडो प्राप्त गर्ने वातावरण बनाउनुपर्ने, कर्तव्य ज्यान मुद्दामा अनुसन्धान गर्न पर्याप्त समय लिने रणनीति बनाउनुपर्ने, जिल्ला न्यायाधिवक्तासँग समन्वय गर्नुपर्ने, गम्भीर ढंगले अनुसन्धानको मिसिल तयार पर्दै नियमित रुजु तथा प्रमाणित गराउनुपर्ने र घटनास्थल तथा शवको पर्याप्त फोटो लिनुपर्ने सुझाव दिएको छ ।

छानबिन प्रतिवेदनका आधारमा घटनाको अनुसन्धानमा खटिएका अनुसन्धान अधिकृत उद्धव पोखरेल उर्लाबारीबाट जिल्ला झिकाइएको छ । मोरङका प्रहरी उपरीक्षक सन्तोष खड्काले घटनाका विषयमा उठेका प्रश्नहरुका बारेमा थप सोधपुछका लागि जिल्लामा तानिएको बताए ।

गत पुस ५ गते बास्तोला मृत भेटिएका थिए । बास्तोलाको मृत्यु प्रकरणमा झापाको दमक घर भई उर्लाबारी–६ बस्ने ३२ वर्षीय राजेश रणपहेली, झापाको गौरादह नगरपालिका–९ का ३१ वर्षीय दीपेश पौडेल, मोरङको रतुवामाई नगरपालिका–१० का २९ वर्षीय निकेश शिवा भनिने मेहरमान दर्जी, कानेपोखरी गाउँपालिका घर भई उर्लाबारी– ६ मा बस्दै आएका १९ वर्षीय सुदीप परियार, उर्लाबारी–९ का ३४ वर्षीय कुमार राई र उर्लाबारी–६ का ६० वर्षीय रमेश गिरीलाई प्रतिवादी बनाइएको छ ।

प्रतिवादी सबै पक्राउ परेका छन् । राई र गिरी जिल्ला अदालतको आदेशपछि धरौटीमा रिहा भएका छन् । सन्दीप परियार र मेहरमान दर्जी पुर्पक्षका लागि थुनामा छन् । दुई जना प्रहरी नियन्त्रणमा छन् ।

प्रतिवादीमध्ये दर्जी, परियार र पौडेल गिरीको घरमा डेरामा बस्थे । बास्तोलालाई लिएर रणपहेली पुस ४ मा त्यहाँ पाहुना गएका थिए । कोठामा पुग्नुअघि सौरभ होटलमा खानपिन गरेको र त्यस क्रममा होटल सञ्चालक कुमार राईसँग विवाद भएको थियो ।

त्यसपछि साथीको कोठामा पुगेर सँगै सुतेकामध्ये बास्तोलाको भने शंकास्पद मृत्यु भएको थियो । प्रहरीले सुतेकै ठाउँमा बास्तोलाको हत्या गरेको निष्कर्ष निकालेको छ ।

Leave a Reply

Your email address will not be published. Required fields are marked *