स्थानीय तह भत्तामा मनपरी खर्च गर्दै सिरहामा

सिरहा । सिरहाको जिल्ला स्तरीय कोभिड–१९ नियन्त्रण समितिले जिल्लाका सबै स्थानीय तहलाई भत्तामा देखाइएको खर्चको विवरण उपलब्ध गराउन निर्देशन दिएको छ ।

कोभिड–१९ नियन्त्रण समितिको आइतबारको बैठकले जिल्लाका १७ वटै स्थानीय तहलाई तीन दिनभित्र भत्ताबारे विवरण उपलब्ध गराउन निर्देशन दिएको हो । समितिले कुन काम गर्दा कहिले कति भत्ता लिएको र भत्ता लिनुको कानुनी आधारसमेत खुलाई विवरण पठाउन भनेको छ ।

 

सिरहाका स्थानीय तहमा कोरोना जोखिम भत्ताको नाममा मनपरी खर्च भएको जनगुनासो देखिएपछि कोभिड–१९ नियन्त्रण समितिले स्थानीय तहहरुलाई यस्तो निर्देशन गरेको हो । ‘स्थानीय तहहरुले उपलब्ध गराएको खर्च विवरणमा भत्तामै धेरै रकम खर्चिएको देखिएको छ,’ समितिका संयोजकसमेत रहेका प्रजिअ प्रदीपराज कणेलले भने, ‘त्यसैले भत्ताको विवरण र आधार उपलब्ध गराउन लगाउने निर्णय गरेका हौं ।’

 

यसअघि जिल्लाका स्थानीय तहहरुले सार्वजनिक गरेको कोभिड–१९ नियन्त्रण तथा रोकथामको खर्च विवरणमा हरेक स्थानीय तहले भत्तामै लाखौं रकम खर्च गरेको देखाएको थियो । ‘जिल्लाका सबै स्थानीय तहहरुले जोखिम भत्ता लिएको भए कुन महिना, दिन र समयमा कुन काम गर्न फिल्डमा खटिए बापत कति रकम जोखिम भत्ता लिएको र त्यस्तो भत्ता लिने कानुनी आधारसमेत खुलाई तीन दिनभित्र विवरण पठाउन अनुरोध छ,’ निर्णयमा भनिएको छ ।

 

‘यस्तो दुःखद घडीमा पनि स्थानीय तहहरुले जोखिम भत्ताको नाममा मनपरी खर्च गरेको देखिन्छ,’ समितिका सदस्यसमेत रहेका नेपाल पत्रकार महासंघका केन्द्रीय सदस्य देवकुमार यादवले भने, ‘काम गरी भत्ता लिएको हो भने लाज मनानी खर्चको विवरण शिघ्र सार्वजनिक गरियोस् ।’

 

यस्तै, बैठकले कोरोना संक्रमण जोखिम न्यूनिकरणका लागि आजै राति १२ बजेदेखि लागू हुने गरी भदौ १२ गते राति १२ बजेसम्मका लागि लकडाउन गर्न सबै स्थानीय तहलाई अनुरोध गर्ने निर्णय गरेको छ । यसैगरी, सबै स्थानीय तहहरुलाई भीटीएम किट खरिद गरी कोरोना परीक्षणको दायरा बढाउनसमेत बैठकले अनुरोध गरेको छ ।

 

जिल्लामा कोरोना परीक्षणको दायरा बढाउन हाल कम्तिमा एक लाख भीटीएम किटको आवश्यकता भएपनि उपलब्ध हुन नसकेको र तत्काल १५ हजार किट उपलब्ध गराइदिन प्रदेश सरकार र संघ सरकारलाई अनुरोध गर्ने निर्णय बैठकमा गरिएको छ ।